2020年11月8號，營運宣佈舉辦Debut Countdown Live，但最神奇嘅係今次竟然唔係好似之前兩次用 Online Live 形式去搞，今次竟然係喺全日本指定嘅戲院直播。我其實真係唔係好明，戲院有收容人數上限但Online冇，仲可以俾外國飯參加埋一份，點解要揀一個有限人數又封閉仲要疫情期間要人去冒險嘅形式去搞？
不過諗諗下，話唔定上兩次好多免費仔用非法途徑去睇，搞到營運要咁絕。反省下啦你班人。
既然有人數限制，即係又要抽飛。其實我都唔覺得我會唔中，其一因為雖然唔係全國戲院都有做直播，但場地都好多，而且分散晒啲人去唔同場地嘅時候，自己每個場嘅競爭相對地少咗啦。其次我覺得會有人因為疫情而選擇唔睇嘅；再加上冇左平手，又少左一堆fans囉 ^^
如是者又真係中咗，最on9係今次得實體飛……我其實唔係咁鍾意實體飛，我覺得好難保存。所有飛喺電子飛個app入面睇到咪算囉。又要俾手續費去印飛，真心唔知做乜。
之前疫情期間有過一排全國戲院賣飛出去要「格啦格啦」咁賣，即係每個位同位中間要留番個空位，等啲人唔好坐咁密。我以為今次都係咁，攞到飛之後去查下先知原來係座無虛席，仲要開咗兩個screen。咁不如你俾我哋去現場睇啦，最多坐遠啲囉。
12月8號，嗰日特登喺公司食左個米粉先出發去戲院。好啦入到去啦開場啦戲院竟然夠膽死播段嘢出嚟話因為防疫關係，唔準企喺度睇同唔準嗌call。好啦然後全場靜靜靜靜靜到散場，連手燈都冇人拎出嚟，唔講都唔知自己睇緊live，以為自己睇緊音樂電影呀。
影アナ 天+夏鈴
之後播咗少少Nobody's fault PV花絮，光仔讀白
開場片，唔知係咪新overture？
係嘅話都好唔炒熱到個氣氛……又或者始終冇得嗌係差少少啩……
Nobody’s fault
穩定發揮，首歌一開始聽真係覺得好怪，依家愈聽愈鍾意！睇得出光仔真係好努力用舞步同表演力去cover佢身高不足呢個問題。表情都好交到戲，對佢將來嘅期待值極高。
MC菅井前隊長(?)挨拶 (嗰陣未公佈櫻坂新隊長同副隊)，光仔介紹nbf呢首歌，加啲雑談
ブルームーンキス
呢首我未聽音源，第一次聽。背景好大個月亮，然後個場暗哂，成員唱嗰陣先有支spot light照住唱嗰啲成員。中間光仔同理佐嗰度差啲忍唔住嗌左出黎！
最終の地下鉄に乗って
個表演同首歌其實都好普通，不過啲詞真係好欅，所以好多人都話櫻既定位係乃曲+欅詞。不過其實其他幾首全部都唔同風格，都唔知佢地依家係咩定位?_?
之後dance track轉夏鈴C嘅兩首，首bgm好好聽，啲成員都好正。夏鈴C啲成員我係最鍾意！(今單櫻玩3C 14人制，除左固定8個前排成員，後排6個成員都會隨住唔同C而換)
Plastic regret
初初睇個名覺得好膠，跟住個前奏又勁王道idol風，本身完全無興趣，但個表演真係估唔到咁正！又係愈聽愈鍾意嘅一首！
MC夏鈴介紹自己C嘅歌
なぜ 恋をして来なかったんだろう？
呢首歌之前煲到痴咗線，MV拍得好，首歌好洗腦，同埋真係感受到欅轉櫻嗰種生まれ変わる嘅感覺：明明アンビバレント嗰陣嘅我咁怕同人接觸，依家發覺有人可以share自己嘅喜怒哀樂真係好美好！可惜正式表演無左MV個繩舞...
之後又dance track，個背景好似喺度播national geographic啲片咁……
半信半疑
又係之前未聽，又係好驚喜既一個表演！！天天C真係好型！同埋呢啲咁嫵媚既舞都幾啱佢
MC到天天介紹自己既歌
Buddies
今次隻碟咁多首入面我覺得最難聽嘅一首，奧運主題曲咁款，不過個表演係幾好睇
唱哂所有歌，成員一個一個出黎講下抱負。之後集合，前隊長就話仲有一首肥秋特別寫俾佢哋嘅歌……
櫻坂の詩(未收錄)
好難聽，除左wkの詩之外呢啲乜乜之詩我都覺得好難聽……同埋個演出都好悶吓，冇乜心機睇
最後20:45左右完，都有成粒幾鐘有啲意外。今次debut single其實都幾進取，七首歌全部唔同風格，又有三個C同唔同成員嘅組合，簡直係試水温之極致。希望佢地唔好再俾營運玩到變自閉，同埋唔好再拎佢地同平手放埋一齊講……
前幾日FNS平手solo同佢地放埋同一日我都真係嬲咗，點解平手solo debut要放喺櫻debut同一日呢？營運其實係想點呢？係咪幫平手拉仇恨值？
總結，今次個live嘅表演係喜出望外。啲舞步好老實講係冇之前欅嗰陣咁激烈，個故事感都唔算好強 (真係要故事感強就全員選拔啦) 但舞步都係複雜同埋係真係好睇 / 型嘅。天天首半信半疑嘅舞步我個人最鍾意， blue moon kiss個演出同舞台效果都好靚。希望佢哋慢慢進步，做番好似當時欅坂嗰陣咁嘅名氣啦。同埋真係諗極都唔明點解要戲院直播，唔該營運唔好再坐住個腦。
