常陸那珂海濱鐵道（ひたちなか海浜鉄道）係由茨城JR勝田站至阿字ヶ浦站既一條氣動車路線。基本上係得嗰度啲住民會搭，所以載客量極少，自然班次都唔多。為左推廣呢條鐵路，所以鐵路公司就揾人重新設計過哂每個站啲路牌，同埋搞下類似今次呢個影相團咁既活動，吸引多啲人認識咁。
我參加呢個團既原因，係因為之前諗住搭呢條線去國營日立海濱公園（順便駅メモ）嗰陣俾個站職員截住叫我唔好搭呢條線去因為好花時間（我知呀！）佢仲好熱心咁教我搭巴士去個公園…所以最後都係搭左巴士，今次呢個團係兩日完全stick on條鐵路度，終於可以搭夠佢！另一個原因係因為每個團員都可以借到部fujifilm X-T3用兩日，仲有個鐵道攝影師隨團教你拍攝技巧。我呢啲攝影渣渣平時用傻瓜菲林機咋，難得有靚機用，又可以偷下師，正！
咁攞完相機我地就搭鐵去第一個影相位喇。到站落左車個攝影師就開始帶啲團友行左成十分鐘…去到一個乜都無既地方…
上面都講左，呢條線班次係勁少，少到係差唔多半粒鐘先一班車…等完一班車，跟住個攝影師又話「不如等多一班再影多次啦」然後又等到下世紀…
好彩因為冬天日照時間短，同埋又密雲，六點幾就番到酒店。本身有個咩懇親会（中文係慰勞宴？但要自費）但我真係攰到癲同埋其他人真係資深鐵道fans我真係無乜野可以同佢地搭到咀，所以無去到 :(
第二日要去影日出的鐵路，所以四點幾集合…對於我黎講，琴日行足一日都唔夠要咁早起身chur，仲要勁凍！負唔知幾多度！我完全無諗過會凍到咁，帶唔夠衫，一開頭都無乜野，愈行個人愈凍，最攞命係又去番琴日第一個影相位然後又喺度呆等佢頭班車呀！！！！
6:11 影完一張，跟住又話等多班
6:26 影第二張，跟住又唔知點解話又等多班（同第一張同一個位但另一個方向影過去）
6:58 第三張，個攝影師仲問其他人駛唔駛等多班車影多次，我真係粗口都爆埋出黎，好彩其他人話唔駛咋…但都繼續喺原地唔願走因為啲團友喺同一個位連拍十萬張然後企左喺度慢慢del del del del del…雖然影快野用連拍係好正常但其實我就好憎用連拍既，我啲相全部都係逐下逐下禁快門影，係好on9不過我覺得天寒地凍企喺個荒野度del相仲on9 LOL
個太陽出左黎之後就無咁凍喇，又行番十分鐘番去搭車番酒店check out + breakfast（我無食到，大佬武漢肺炎仲食buffet breakfast係咪痴線）然後終於去到最後一個影相位！就係琴日食便當嗰個站既車輛基地！！我真係好感動，因為終於唔駛狂行路啦！！
其實個基地真係勁細…10分鐘都睇完，但就喺嗰度磨左成粒鐘…
最後最後…仲有個咩交流會，要你喺呢兩日影既相入面揀一張出黎present，咁呀攝影師就會俾番啲意見你咁樣。我就揀左今朝 6:58（即係置頂嗰幅圖）黎講啦，攝影師個comment竟然係「構圖好創新」我先知原來鐵膠影鐵，係真係淨係影部車，唔會影埋周圍啲野…等我仲諗住加啲前景等個構圖豐富啲…跟住又話咩光線影得好好？？？唔關我事呀，係部機勁（認真）present完，攞埋霞姨個飯盒（原來包兩日既駅弁）還埋相機就現場解散了～
參加完我真係覺得影相呢啲野都係自己一個去就好喇，同啲完全唔係自己節奏既人一齊去真係好痛苦，太快影完又要等埋人地，人地影得快自己又唔好意思。同埋其實個團都唔平，￥17000包兩日既鐵路pass任搭，兩日既便當，第二日既早餐，一張16GB SD card，租相機錢（？）同埋啲雜費保險，有領隊但無導遊，個攝影師以為會有咩教啦點知係教你部相機啲setting，一係就叫你「影多啲就識」咁我都知…邊個唔知？仲要東京來回茨城既特急都差唔多八千円，其實真係貴貴地，所以真係一次就夠…
然後過左一個月無啦啦有日收到本雜誌發覺我拎出黎present張相上左雜誌 LOL 完。
