[前言] 201208 櫻坂再出發 Debut Countdown Live

欅坂46 2016年出道，第一首主打歌「サイレントマジョリティー (Silent Majority)」爆紅，同年已經憑住呢個勢上到紅白。

2017年出到第四隻單曲「不協和音」，握手會有痴線佬攞住個發煙筒諗住去斬呀不動Center平手。自此之後平手愈嚟愈自閉，同頭三單比好似變左另一個人咁。

去到2019年頭，順風順水嘅欅坂推出第八隻單曲「黒い羊」，然後……

同年，２期生開始參加演出，團隊亦都首次登上東京巨蛋嘅舞台。第四次上紅白，唱番前年2017年唱到缺氧嘅不協和音。


然後就沒有然後了。


2020年1月23號，不動Center平手宣佈退團 (err用佢嘅字眼係「脫退」，是但啦咪即係唔撈囉)，連我最鍾意嘅鈴本美愉都卒業呀呀呀呀呀呀！！！！！！！！！！

靜左個2020年嘅上半年，7月16號佛心營運終於搞左個Onlive Live！滿心歡喜挖番晒啲手燈乜乜乜出嚟諗住開心番晚，hi auntie嗰晚竟然宣佈成團砍掉重練，10月改名再出發。當刻我真係唔知俾個咩反應？？？點解5年嚟嘅努力可以咁樣俾人一嘢抹殺晒？？？

個心情真係好忐忑，好不忿營運咁對班女仔啦、好唔想欅嘅風格改變啦，更加唔想見到啲代Center成日為咗做到好似平手咁，又俾大壓力自己，又做到個表演好刻意。改名係咪真係一個最好嘅選擇呢？曲風變咗仲係咪我鍾意嘅嗰隊組合呢？有幾多人會因為無咗平手而棄推佢哋呢？


個心只有無盡嘅不安。我諗班女仔仲不安。


10月12 / 13號，連續兩晚The Last Live，都唔係唱晒所有欅嘅歌，然後就封印了。最尾仲要唱埋改咗名之後嘅一單「Nobody's fault」。ummmm，首歌聽落有啲韓風 (sorry其實我唔聽Kpop，我都唔係好知叫咩) 又無以前咁激昂，仲有啲邪教feel，嗰一刻我心入面只有「做乜勁？？？」呢個感想。

但認真聽落，都幾襟聽嘅，開頭啲結他聲好正；又認真諗落，無以前咁激昂，都只係因為以前太激昂啫，俾班女仔抖吓啦。(友香唔記得咗邊隻腳得番一條韌帶CLS) 再加上其他兩首歌嘅PV，同埋啲c/w都真係有啲喜出望外，對佢哋啲信心番晒嚟！

改名又點呀！咪又係同一班女！無左平手好失禮咩，我地有ぽんぽん！我哋有るんるん！(雖然無左鈴本真係好L傷sosad) 二期生都終於可以表現自己一面出嚟，唔駛再做其他人嘅影子！

如是者過咗一個幾月，欅坂46終於要以櫻坂46之名再出發！！！！！！